Så til saka. Det er i hovudsak stor semje i sykkelmiljøet om at ein ynskjer å auke andelen damer i sykkelsporten. Ritt som Styrkeprøven har eigen dameklasse, og klubbar som Sagene tilbyr lågare innmeldingsavgift til kvinner.
Vi damer prøver også å stille opp der vi kan, og innimellom kreve vår plass. Det gjorde Ladies Tour of Norway, som krevde to millionar kroner frå NCF, som skjulte millionkontrakta for kvinnerittet.
Bladet Landevei oppfordrar også damene til å stille opp og «ta plass». Difor har eg vore skuffa over dekninga dykkar av Zwift-ritta NCF arrangerte i vår. Der stilte Norgeseliten av damer opp, og fekk stort sett eit par setningar nederst i kvar artikkel. Det var primært kun ei oppramsing av dei tre beste plasseringane.
Eg tenkte ein gong at no får damene fokus. Ein artikkel frå Landevei dukka opp i sosiale media, og eg vart gledeleg overraska over ingressen: "I går ble den andre runden av NCF Grand Prix kjørt på Zwift, her finner du kommentarer fra vinnerne og resultater fra alle klasser".
Kult, tenkte eg, eg har sakna intervju med vinnaren, eller kven som helst i dameklassen i samtlege artiklar eg har lest. No er det betring på gang. Vel, eg vart skuffa. Det var ikkje noko intervju med damene. Fiffig nok var det intervju både med vinnaren av herreklassen, samt han som ikkje vann.
Her kjem difor eit par konkrete forslag til korleis Landevei kan bidra til å promotere damer i sykkelsporten. På 1881.no var det ganske enkelt å finne telefonnummeret til både Trude Wermskog Stormo som vann rittet i den nevnte artikkelen, og Ingrid Moe, som kom på andreplass. Det er høgst tenkeleg at kvinnelege ryttarar stiller til intervju om dei blir spurt.
Eg ville prøvd det. Om dekninga ein gong hadde starta med å oppsummere dameklassen, hadde det vore svært artig, men eg skal ikkje be om for mykje på ein gong. Reint personleg ynskjer eg meg fleire testar av syklar og utstyr spesifikt til damer, sidan vi har litt skrinnare utval.
Å endre sykkelsporten til å bli meir likestilt er litt som Jotunheimen Rundt, langdrygt og tungt undervegs, men verdt det om ein kjem i mål. Om Landevei vil vere med og bidra, og kanskje ta nokre etappar i front, vil det vere til stor hjelp.
Beste helsing
Anne-Mari Samskott
